第一課-----周成過台灣 第一幕

　　　　人生在世著海海，用心計較才會是非來；
　　　　無好無歹才常在，激氣賭勇難趫排。

月﹕（出台）參見爹親萬福。
溫﹕免禮。
月﹕新婦有代志 想卜合阿爹參詳。……夫君想卜出外鄉﹐叫我……
溫﹕出啥麼外鄉？
月：伊講…….
伊講台灣所在錢好捻﹐新興氣象一片天；
想卜台灣求發展﹐講卜認真撲拼趁少年。
溫：去台灣？ hng !
今台灣人 敖扔鑽﹐ 奸雄梟行雞鳥腸；
我甘願一日乾焦食一頓﹐嘛無卜互伊 離鄉離家門。
月：爹親不是常常底講，講啥麼 男兒立志在四方(su3-hong1)，安尼，互伊出外撲拼 敢不是合情 合理 合應當？
溫：o ho ，真是我e好新婦，閣會曉卻我e話 給我突(tuh8)，安爾合我茹(ju5)!…… 不閣，… a， 月里a﹐不是為父不肯互伊出外求發展﹐實在是成仔 即e囝仔， 自細漢就是「人牽不行﹐鬼牽遛遛走」﹐即款的心性若去台灣﹐啊，

會親像風吹斷了線﹐未曾賺錢代先學虛華﹔
上界了解道是我﹐ 月里不通烏白聽伊彈﹐聽伊醆﹐
聽伊聽及流嘴涎,﹐我驚結尾會難收山﹐
我驚你會遭受閣卡大的拖磨。

月﹕爹親﹐人講「牛有鐐﹐人無鐐」﹐伊講絕對卜好好仔撲拼﹐…..咱著互伊機會嘛﹐…….
溫﹕撲拼？卜撲拼哪著一定去台灣？伊箸厝 道不討賺﹐歸日荒忙﹐酒､儌､查某﹐逐項來﹐誰相信去台灣道會改變？ 呀你看即每le﹐七早八早道無看人影﹐參代志嘛道叫你來講﹐實在愈來愈不是款！
月﹕伊講早起卜去….
溫﹕你不免閣替伊解說啦。 你雖是我自細漢育(io1)的新婦仔﹐我疼你卻是勝過家己的親生子。飼子是義務﹐我不敢寄望即個子會賴有孝、致蔭我=﹐我無贊成伊去台灣﹐是為你設想﹐…..俗語講得好﹐「平安就是福」﹐榮華富貴難得求﹐「數想卜好譽﹐有時遂著變乞食」。


月﹕爹親的意思新婦了解。 不過﹐夫君既然興卜去台灣﹐若無互伊去﹐心內永遠道會giauhN8-giauhN8。 儂朝全伯仔伊（in1）後生春生仔﹐舊年才去台灣﹐即每寄錢返來底起大厝。 阿爹﹐咱道互伊即個機會嘛﹐若會當像安爾成功賺錢﹐是咱命底好﹔ 萬一若失敗﹐…..儂我也認命啦。 就求爹親互伊去撲拼看覓le……？
溫﹕唉！（搖頭嘆氣）你道是安爾﹐逐項順伊=……..﹐呀船租le？
月﹕之由新婦來去伐落就是。 多謝阿爹。
（落幕）